އެމެރިކާއާއި އީރާނާ ދެމެދު އޮތް ހަމަލާ ބަދަލުކުރުން ހުއްޓާލުމުގެ އެއްބަސްވުން އިތުރުކުރުމަށްޓަކައި މަޝްވަރާކުރާ ފަރާތްތަކުން އެއްބަސްވުމެއްގެ އޮނިގަނޑު އެކުލަވާލާފައިވާ ކަމަށް އެކްސިއޯސް (Axios) އިން ރިޕޯޓްކުރުމާ ގުޅިގެން، ދުނިޔޭގެ ބާޒާރުގައި ތެލުގެ އަގު މިއަދު ދަށްވާން ފަށައިފިއެވެ.
ވައިޓް ހައުސްއިން ވަނީ އެކްސިއޯސްގެ ރިޕޯޓުގެ ސައްހަކަން މާކެޓްވޮޗް (MarketWatch) އަށް ކަށަވަރުކޮށްދީފައެވެ. އެ ރިޕޯޓުގައިވާ ގޮތުން ދެ ގައުމުގެ މެދުގައި މިހާރު ވަނީ 60 ދުވަހުގެ މުއްދަތަށް ހަމަލާ ބަދަލުކުރުން ހުއްޓާލުމަށާއި، އީރާނުގެ ނިއުކްލިއާ ޕްރޮގްރާމާ ގުޅޭގޮތުން މަޝްވަރާ ކުރުމަށް ފަހުމުނާމާއެއް އެކުލަވާލާފައެވެ. ނަމަވެސް، މި އެއްބަސްވުމަށް އަމަލުކުރުމަށް ރައީސް ޑޮނަލްޑް ޓްރަމްޕްގެ ހުއްދަ ބޭނުންވާނެއެވެ.
މި ޚަބަރާއެކު، ބްރެންޓް ކުރޫޑް ތެލުގެ އަގު %0.6 އަށް ވެއްޓި ފީފާއެއްގެ އަގު 93.70 ޑޮލަރަށް ވަނީ ތިރިވެފައެވެ. އަދި އެމެރިކާގެ ވެސްޓް ޓެކްސަސް އިންޓަރމީޑިއޭޓް (WTI) ތެލުގެ އަގު %0.4 ދަށްވެ، ފީފާއެއްގެ އަގު ހުރީ 88.27 ޑޮލަރުގައެވެ.
މި ކުރިއެރުންތައް އައިސްފައިމިވަނީ ބުދަ ދުވަހުގެ ރޭ އެމެރިކާއާއި އީރާނާ ދެމެދު ވަރުގަދަ ހަމަލާތަކެއް ބަދަލުކޮށްފައިވާ ދަނޑިވަޅެއްގައެވެ. އެމެރިކާއިން ވަނީ އީރާނުގެ ދެކުނުގައި އޮންނަ ބަންޑަރު އައްބާސްގެ އަސްކަރީ މަރުކަޒަކަށް އަމާޒުކޮށް ހަމަލާތަކެއްދީ، އީރާނުގެ ޑްރޯންތަކެއް ވައްޓާލާފައެވެ. މިއީ ފާއިތުވި ތިން ދުވަހުގެ ތެރޭގައި އެމެރިކާއިން އީރާނުގެ އަސްކަރީ މަރުކަޒުތަކަށް ދިން ދެވަނަ ހަމަލާއެވެ.
އޭޖޭ ބެލް (AJ Bell) ގެ އިންވެސްޓްމަންޓް ޑައިރެކްޓަރު ރަސް މޯލްޑް ވިދާޅުވި ގޮތުގައި، ދެ ގައުމުގެ މެދުގައި ބަދަލުކުރެވުނު އާ ހަމަލާތަކުގެ ސަބަބުން މިހާރު އޮތް ނާޒުކު ސުލްހައިގެ އެއްބަސްވުމަށް ވަނީ ގޮންޖެހުންތަކެއް ކުރިމަތިވެފައެވެ. އަދި މީގެ ސަބަބުން ހޮރްމޫޒް ކަނޑުއޮޅި ހުޅުވާލުމާއި ދުނިޔޭގެ އިގްތިސާދަށް އޮތް ނުތަނަވަސްކަން ކުޑަވުމަށް ހުރަސްތަކެއް އެޅިދާނެ ކަމަށް އޭނާ ފާހަގަކުރެއްވިއެވެ.
ރައީސް ޓްރަމްޕް ބުދަ ދުވަހު ވިދާޅުވީ، ހޮރްމޫޒް ކަނޑުއޮޅީގެ ކޮންޓްރޯލް އޮމާން އާއި އީރާނަށް ލިބޭ ގޮތަށް އޮންނަ އެއްވެސް އެއްބަސްވުމަކަށް އެމެރިކާއިން އެއްބަސްނުވާނެ ކަމަށެވެ.